Այսօր կառավարության նիստի ավարտից հետո ՀՀ էկոնոմիկայի նախարար Կարեն Ճշմարիտյանից լրագրողները հետաքրքրվեցին՝ Արևմուտքի սանկցիաները Ռուսաստանի վրա ինչպե՞ս կանդրադառնան Հասյաստանի տնտեսության վրա: Հնարավո՞ր է՝ այս սանկցիաները Հայաստանի՝ արտաքին քաղաքական կուրսի փոփոխության և ԵՄ ասոցացման համաձայնագրի ուղղությամբ մտածելու հնարավորություն տան:
Կարեն Ճշմարիտյանը խորհուրդ տվեց այս հարցերն ուղղել ԱԳ նախարարին, ապա հավելեց. «ԵՄ-ի հետ այցելության ժամանակ Բրյուսելում պայմանավորվածություն ձեռք բերվեց, ընդ որում՝ բոլոր գլխավոր տնօրինությունների հետ, որ մենք շարունակելու ենք խորացնել և ընդլայնել մեր համագործակցությունը եվրոպական մեր գործընկերների հետ: Խնդիրը ձևաչափի ընտրությանն էր վերաբերում: Այսինքն՝ սեպտեմբերին ԵՄ մեր գործընկերները խոստացան կազմել համատեղ աշխատանքային խումբ, որոնք կմշակեն, կքննարկեն առկա իրավիճակը և կառաջարկեն որոշակի ձևաչափեր: Այդ ձևաչափերի ընտրությունից հետո հեկտեմբերին նախատեսվում է Բրյուսելում համագործակցության կոմիտեի համատեղ նիստ անցկացնել, որը բխում է ԵՄ-ի հետ մեր նախորդ համաձայնագրերից, և այդ համաձայանագրերի շրջանակներում ձևաչափերն ընտրելուց հետո մենք կշարունակենք մեր համագործակցությունը»:
Լրագրողները հետաքրքրվեցին՝ Եվրասիական տնտեսական միության անդամակցության ուղղությամբ Հայաստանին ի՞նչ է սպասվում. կանխատեսումներ կան, որ այդ միությունը կարող է այդպես էլ չիրականանալ:
«Ես ծանոթ չեմ այդպիսի կանխատեսումների»: Իսկ ե՞րբ ենք անդամագրվելու ԵՏՄ-ին, պատասխանեց. «Երբ բանակցությունները ավարտվեն, որոշենք ստորագրել: Այսօրվա դրությամբ նոր առաջարկներ մեր գործընկերներից չկան»: