Այսօր երկօրյա աշխատանքային այցով Մոսկվայում գտնվող վարչապետ Հովիկ Աբրահամյանը հանդիպել է նախկին նախագահ Ռոբերտ Քոչարյանի հետ: Ըստ «Առաջին լրատվական»-ի լավատեղյակ աղբյուրի՝ հանդիպումը կայացել է Սամվել Կարապետյանին պատկանող Մոսկվայի «Արարատ Փարկ Հայաթ» հյուրանոցում:
Ակնհայտորեն Ռոբերտ Քոչարյանը և Հովիկ Աբրահամյանը չեն ցանկանում հանդիպել Հայաստանում, կամ իրենց հանդիպումները պլանավորում են Հայաստանից դուրս՝ աչքի չընկնելու համար: Հնարավոր է՝ կողմերը հայտարարեն, որ այդ հանդիպումը եղել է զուտ պատահականության արդյունք. Ռոբերտ Քոչարյանը շատ պատահաբար եղել է Մոսկվայում և, սովորության համաձայն, հյուրընկալվել է այս հյուրանոցում, իսկ վարչապետ Աբրահամյանն էլ աշխատանքային այցի շրջանակներում է հանգրվանել հայազգի գործարարին պատկանող հյուրանոցում, և ահա նրանք միանգամայն պատահաբար հանդիպել են հյուրանոցի լոբբիում:
Հիշեցնենք, որ նման մի պատահական հանդիպում էլ տեղի էր ունեցել մի քանի տարի առաջ, երբ Ռոբերտ Քոչարյանը և Հովիկ Աբրահամյանը հանդիպել էին Պրահա-Երևան ինքնաթիռի սրահում:
Հետաքրքիր է, որ այս հանդիպումը տեղի է ունենում ԲՀԿ ղեկավար Գագիկ Ծառուկյանի կազմակերպած համաժողովից ուղիղ մեկ օր հետո. համաժողով, որը ավելի շատ հարցեր առաջացրեց, քան տվեց դրանից սպասվող հարցերի պատասխանը:
Հավանաբար Ռոբերտ Քոչարյանը և Հովիկ Աբրահամյանը պետք է իրենք գտնեն ամենակարևոր հարցի պատասխանը. ինչ անել ԲՀԿ-ի և նրա ղեկավարի հետ՝ շարունակել նրա հե՞տ, թե՞ առանց նրա՝ մանավանդ, որ Ծառուկյանը փորձում է ցույց տալ, թե ինքն ավելի հակված է դուրս գալ խաղից և դրանով ապահովագրել իրեն:
