Ֆուտբոլի Եվրոպայի 2020 թվականի առաջնության ընտրական փուլի Լիխտենշտեյնի և Ֆինլանդիայի հավաքականների հետ հանդիպումներին ընդառաջ՝ երկրպագուների շրջանում լարվածությունն օր օրի ավելի է մեծանում: Նախօրեին Կամո Հովհաննիսյանի վնասվածքը մտահոգվելու լուրջ տեղիք տվեց: Այսօր շատ է խոսվում այն մասին, թե ով կարող է խաղալ Հովհաննիսյանի փոխարեն, և ինչ տակտիկական լուծում կարելի է գտնել բացը լրացնելու համար: Երեկ Ա սերիայի «Լեչեի» հետ հանդիպման վերջնամասում աճուկի վնասվածք ստացավ մեր հավաքականի ավագ Հենրիխ Մխիթարյանը և լքեց խաղադաշտը:
Տեղի ունեցածը ոչ միայն մտահոգություն, այլև իրական պանիկա է առաջացրել ֆուտբոլասերների շարքերում: Շատերը վստահ են, որ առանց Մխիթարյանի մեր ազգային թիմը առաջիկա երկու հանդիպումներում չի կարողանա լուծել իր առջև դրված խնդիրը, այն է՝ 6 միավոր վաստակելը: Հավանականությունը մեծ է, որ Լիխտենշտեյնին և Ֆինլանդիային հաղթելու դեպքում Հայաստանի հավաքականը ընտրական փուլի ավարտից 2 տուր առաջ ենթախմբում կհանգրվանի երկրորդ հորիզոնականում:
Ինչպես հայտնում է Il Tempo պարբերականը, հայ կիսապաշտպանի վնասվածքը լուրջ չէ, և նա պատրաստ կլինի «Ռոմայի» առաջիկա խաղին: Իտալական թիմը հոկտեմբերի 3-ին Եվրոպա լիգայի խմբային փուլի երկրորդ տուրում մրցելու է ավստրիական «Վոլֆսբերգերի» հետ: Ամեն դեպքում, քանի դեռ չկա պաշտոնական տեղեկություն Մխիթարյանի վնասվածքի վերաբերյալ, անհանգստության մթնոլորտը շարունակում է թեժ մնալ:
Սեպտեմբերի 8-ին Երևանում տեղի ունեցած Բոսնիա-Հերցեգովինայի դեմ մրցավեճում Մխիթարյանը փայլուն խաղ էր ցուցադրել և էապես նպաստել մեր հաղթանակին: «Լեչեի» դեմ մրցավեճում ևս մեր ավագն իր բարձրության վրա էր, և նրա փոխանցումից հետո Էդին Ջեկոն խփեց միակ և հաղթական գնդակը: Նախօրեին Հայաստանի ազգային հավաքականի գլխավոր մարզիչը հրապարակել էր այն 14 լեգեոներների անունները, որոնք հրավիրվել են Լիխտենշտեյնի և Ֆինլանդիայի հետ հանդիպումներին: Տևական դադարից հետ կրկին ազգային թիմից հրավեր է ստացել կոլումբիական «Դոպորտիվո Բոկայո Չիկոյի» եզրային պաշտպան Ժոաո Մոնրո Արարատը: Վերջինիս Գյուլբուդաղյանցն ըստ էության դիտարկում է որպես Կամո Հովհաննիսյանին փոխարինող:
Հիշեցնենք, որ դեռևս անցյալ տարի Արարատը Հայաստանի ազգային հավաքականի կազմում անցկացրել էր մի քանի հանդիպում, և կարող ենք ասել, որ վատ տպավորություն չէր թողել: Բայց թե որքանով կկարողանա օգնել նա Հայաստանի հավաքականին առաջիկա հանդիպումներին՝ դժվար է ասել: Վերջին շրջանում Արարատը կայուն կերպով մասնակցում է իր թիմի հանդիպումներին, և կարելի է ասել, որ մարզավիճակի հետ կապված խնդիր չունի: Չմոռանանք, սակայն, որ այս ֆուտբոլիստը հավաքականին միանալու է հեռավոր Կոլումբիայից: Նման ուղևորությունը բնականաբար կարող է բացասաբար ազդել ֆուտբոլիստի ընդհանուր ֆունկցիոնալ վիճակի վրա:
Ինչևէ, վնասվածքներից ու խնդիրներից զատ՝ հարկ ենք համարում անդրադառնալ մեր հավաքականին վերաբերող դրական կողմերին, որոնք կարող են նպաստել առաջիկա հանդիպումների դրական արդյունքին: Մեր առանցքային ֆուտբոլիստներից Մարկոս Պիզելին վնասվածքից հետ վերսկսել է արդյունավետ ելույթները ղազախական «Ակտոբեում»: Սկսել է խաղալ նաև Արաս Օզբիլիսը, որը վերջերս պայմանագիր էր կնքել Երևանի «Փյունիկի» հետ: Իր նորամուտի խաղում Օզբիլիսը նաև գոլի հեղինակ էր դարձել: Հուսով ենք, որ մինչև մեզ համար խիստ կարևոր հանդիպումները Օզբիլիսը կբարելավի մարզավիճակը: Նման պատասխանատու հանդիպումներում փորձառու ֆուտբոլիստների դերը ավելի քան մեծ է:
Մեր մյուս առաջատարներից Սարգիս Ադամյանը նորամուտը նշեց Բունդեսլիգայում: «Հոֆենհայմի» կազմում նա արդեն երկու անգամ փոխարինման է դուրս եկել և աչքի ընկել ակտիվությամբ: Մինչ այս Ադամյանը «Հոֆենհայմի» երկրորդ թիմում էր: Արդյունավետությամբ աչքի են ընկնում նաև մեր առանցքային մյուս ֆուտբոլիստները, մասնավորապես՝ Ալեքսանդր Կարապետյանն ու Հովհաննես Համբարձումյանը:
Այսօր մենք ունենք այն շարժիչ ուժը, որը կարող է ցանկալի արդյունք ապահովել: Պետք է հասկանալ, որ ազգային հավաքականի մակարդակով մրցաշարերին միշտ չէ, որ հնարավոր է լինում հավաքագրել օպտիմալ կազմ: Խնդիրներ լինում են գրեթե բոլոր հավաքականներում: Մեր դեպքում, սակայն, ֆուտբոլիստներից մեկի բացը շատ ավելի ցայտուն է նկատվում, քանզի չունենք ռեսուրս և համապատասխան ռեզերվ: Ունենք Մխիթարյան, որը խաղամակարդակով մի քանի անգամ գերազանցում է մյուս ֆուտբոլիստներին: Նրա բացակայությունը բնականաբար կխառնի գլխավոր մարզչի խաղաքարտերը, քանզի խաղը կառուցելիս Մխիթարյանի դերն ուղղակի հսկայական է: Մոտ մեկ շաբաթից Հայաստանի ազգային թիմը կսկսի հավաքը:
Մեզ մնում է հուսալ, որ մինչ այդ ազգային թիմի ֆուտբոլիստները իրենց ակումբներում առաջին հերթին վնասվածք չեն ստանա: Լիխտենշտեյնի և Ֆինլանդիայի հավաքականների հետ հանդիպումներն իսկապես շատ կարևոր են մեզ համար: