Վերջին օրերի ընթացքում իրավիճակն Ամուլսարում կրկին լարվել է: Ջերմուկի և Գնդեվազի բնակիչները արդեն երկու տարուց ավելի բաց երկնքի տակ, սադրանքներին և բռնություններին դեմ հանդիման պայքարում են առողջ միջավայրում ապրելու համար: Թեմայի շուրջ զրուցելու համար «Առաջին լրատվական»-ը հյուրընկալել է փաստաբան Նազելի Վարդանյանին:
Ինչպես նշեց մեր զրուցակիցը՝ վերջին 10 օրերի ընթացքում «Լիդիան» ընկերությունը իր հրավիրած պահնորդական ընկերության միջոցով տարբեր սադրանքների է դիմել՝ գիշերով զինված ջոկատ է մտցրել այդտեղ, որն ընդհանրապես իմաստ չուներ, քանի որ մինչ այդ պահնորդական ընկերությունը նորմալ կատարում էր իր գործառույթները. «Նպատակն էր սրել իրավիճակը, և փառք ու պատիվ ջերմուկցիներին, որ այդ սարդրանքներին չեն գնում: Բայց ի վերջո, բաժակը լցվելու է»:
Խոսելով կառավարության դիրքորոշման մասին՝ Նազելի Վարդանյանն ասաց. «Երկու տարի է՝ լռություն է: Տարբեր խոստումներ եղան, տարբեր գումարներ ծախսվեցին, ասվեց, որ եթե նույնիսկ 0.001 տոկոս ռիսկ լինի, այդ հանքը չի գործարկվի: Մարդիկ հավատացին, բայց այդ խոստումները մնացին օդում»:
Մեր զրուցակիցը ընդգծեց՝ մարդիկ այսօր էլ են հավատում կառավարությանը, որովհետև նրանք այն մարդիկ են, ովքեր հեղափոխություն են արել և հավատացել են, որ արդյունք կլինի:
Հարցազրույցն ամբողջությամբ՝ տեսանյութում:
