«Ուզում եմ ընդգծել, որ սա հայտարարություն չէր, այլ հարցազրույցի ընթացքում հնչած հարցի պատասխան, ուստի պատրիարքը չէր կարող այդ մասին չխոսել, եթե հարց էր հնչել: Իսկ հարցազրույցը տրվել էր Sabah իշխանամետ թերթին, արդեն պարզ է, որ ըստ այդմ էլ պետք է Սահակ Մաշալյանն իր պատասխանը տար… Պետք չէր այդքան բուռն արձագանքել կամ քննադատել պատրիարքին, քանի որ նրա օգտագործած բառապաշարը բավականին դիվանագիտական էր՝ նախորդների հետ համեմատած: Բացի դրանից՝ կան բազմաթիվ տողատակեր, որոնք հաշվի չեն առնվում»,- այս մասին «Առաջին լրատվական»-ի հետ զրույցում ասաց «Օրբելի» կենտրոնի փորձագետ Անահիտ Վեզիրյանը՝ անդրադառնալով Պոլսի նորընտիր պատրիարք Սահակ եպիսկոպոս Մաշալյանի արձագանքին ԱՄՆ Սենատի կողմից Հայոց ցեղասպանության վերաբերյալ բանաձևի ընդունմանը:
Թուրքագետ Անդրանիկ Իսպիրյանն իր հերթին շեշտեց, որ Թուրքիայում բավականին բարդ է լինել Պոլսո Հայոց պատրիարք: Բացի դրանից՝ պատրիարքը պատասխանատու է ավելի քան 50 հազար հայի անվտանգության համար, ուստի նա չէր կարող այլ բան ասել: «Պատրիարքը բավականին դիվանագիտորեն արտահայտվեց, նա չի ասել, որ ԱՄՆ-ն չպետք է նման բանաձև ընդուներ»:
Վեզիրյանը, որը ներկա է գտնվել Պոլսում պատրիարքի ընտրություններին, նշեց նաև, որ դրանք բավականին հանգիստ են անցել՝ չնայած լարված գործընթացին: Հարցին, թե ինչ ակնկալիքներ կարող ենք ունենալ Մաշալյանից, նա պատասխանեց. «Համայնքի այն հատվածը, որը մասնակցել է ընտրություններին, մեկ ակնկալիք ունի Մաշալյանից՝ միասնություն և խաղաղություն համայնքի ներսում, որը շատ կարևոր է: Եթե մենք այլ ակնկալիքներ էլ ունենանք Մաշալյանից, նա այդ ամենը չի կարող իրականացնել, եթե համայնքի ներսում խնդիրները չկարգավորվեն»:
Առավել մանրամասն՝ տեսանյութում: