Երևանի ավագանիում ինտրիգային դրվագները փոքր են, բայց արժանի են ուշադրության՝ գոնե դրանց քաղաքական դրդապատճառները բացատրելու առումով, մանավանդ որ դրանք տեղի են ունենում խորհրդարանական և ավագանու ընդդիմության որոշակի ակտիվության ֆոնին:
Հիշեցնենք՝ Երևանի ավագանու կազմում «Լույս» դաշինքը ներկայացնում են «Լուսավոր Հայաստանից» Դավիթ Խաժակյանը և «Հանրապետություն» կուսակցությունից Թեհմինա Վարդանյանը, Անի Խաչատրյանը։
Ինչպես գիտեք՝ «Լուսավոր Հայաստան»-ը անսպասելի հայտարարել է Երևանի ավագանու իր անդամին հետ կանչելու որոշման մասին՝ բավականին թափանցիկ ակնարկելով, որ չեն ցանկանում ասոցացվել «Լույս» խմբակցության մյուս՝ «Հանրապետություն» կուսակցության երկու անդամների վարքագծի հետ: Արդյո՞ք տեղի ունեցածը կապ ունի ներքաղաքական մթնոլորտի հետ:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Տիգրան Ուլիխանյանը, քաղտեխնոլոգ Կարեն Քոչարյանը և քաղաքագետ Արմեն Վարդանյանը:
Կարեն Քոչարյանի դիտարկմամբ՝ տեղի ունեցածը քաղաքական դաշտում ընթացող պրոցեսների տրամաբանության մեջ է, բայց կոնկրետ այս դեպքը, այնուամենայնիվ, ավելի շատ «Լույս» դաշինքի խնդիրներն է վերհանում: «Քաղաքային իշխանությունների ընտրություններին նախկին «Ելք» դաշինքի անդամ երկու կուսակցությունները՝ «Լուսավոր Հայաստանը և «Հանրապետությունը» մասնակցեցին միասին՝ «Լույս» դաշինքով, իսկ ԱԺ ընտրություններին մասնակցեցին առանձին. այստեղից էլ սկսվեցին խնդիրները, որոնք մեծ չէին: Այնուամենայնիվ, քաղաքական այս ապահարզանը տևեց մեկ տարի, կարծում եմ, սա վերջին դրվագն է»,- նշեց քաղտեխնոլոգը:
Տիգրան Ուլիխանյանը կարծիք հայտնեց, որ փորձ է արվում Դավիթ Խաժակյանին առանձնացնել «Լույս» խմբակցության մյուս անդամներից, քանի որ դաշինքի մյուս անդամների վարքագծի պատճառով քննադատության թիրախ է դարձել «Լուսավոր Հայաստան» կուսակցությունը. «Սա քայլ էր հասարակությանը ինֆորմացիա տալու այն մասին, որ ավագանու «Լույս» խմբակցությունը չպետք է նույնացնել «Լուսավոր Հայաստան» կուսակցության հետ»: Պատգամավորը նաև ընդգծեց, որ Դավիթ Խաժակյանն ավագանու բավականին արդյունավետ անդամ է, և նրա հեռանալով Երևան համայնքը կտուժի:
Արմեն Վարդանյանի դիտարկմամբ՝ Դավիթ Խաժակյանը լուրջ հարցեր է բերում օրակարգ, իսկ «Լույս» դաշինքի մյուս անդամներն անլրաջցնում են պրոցեսը՝ լեզվակռվի մեջ մտնելով և ծաղրանքներով՝ բուն գործընթացը մնում է ստվերում:
«Դավիթ Խաժակյանը խոստումնալից քաղաքական գործիչ է, կարծում եմ՝ նա մանդատը վայր չի դնի»,- հավելեց քաղաքագետը:
Մանրամասն՝ տեսանյութում:
