Օրերս E-draft.am կայքում հրապարակվեց ՀՀ Արդարադատության նախարարության՝ «Հեռուստաընկերության և ռադիոյի մասին» ՀՀ օրենքում փոփոխություն և լրացում կատարելու մասին օրենքի նախագիծը, ըստ որի՝ Հանրային հեռուստաընկերությանը տրվելու է վճարովի գովազդ հեռարձակելու թույլտվություն՝ մեկ եթերային ժամում մինչև 5 րոպե տևողությամբ: Նախագծի համաձայն՝ Հանրային հեռուստաընկերությամբ հեռարձակվող գովազդի 1 րոպեի արժեքը սահմանելու է հեռուստաընկերության գործադիր տնօրենը։
Թեմայի վերաբերյալ «Առաջին լրատվական»-ը զրուցեց Երևանի մամուլի ակումբի նախագահ Բորիս Նավասարդյանի հետ։
«Շատ դժվար է որոշել՝ արդյոք արժի՞, որ Հանրային հեռուստառադիոընկերությունն իրավունք ունենա առևտրային գովազդ տարածելու, թե՞ ոչ․ ես գտնում եմ, որ մինչ դրան հասնելը՝ նախևառաջ պետք էր ունենալ հայեցակարգ, թե ընդհանրապես Հայաստանում հեռարձակվող լրատվամիջոցների զարգացումն ինչպես ենք պատկերացնում և միայն այդ հայեցակարգն ունենալու պարագայում որոշել, որ արժե Հանրային հեռարձակողը նաև առևտրային գովազդ տարածի։ Հայաստանում այս կարգի հայեցակարգ, փաստորեն, չի մշակվել և ես համոզված են նաև, որ չեն կատարվել լուրջ ուսումնասիրություններ, թե այդ գովազդային եկամուտներն արդյոք միակ հնարավորությունն են Հանրային հեռուստառադիոընկերության խնդիրները լուծելու համար, որովհետև այդ նախագծի հիմնավորման մեջ մենք շատ ընդհանուր ձևակերպում ենք տեսնում, թե դա անհրաժեշտ է ընդհանուր վերազինման համար։ Մի շարք կարևոր կոմպոնենտներ չեն ուսումնասիրվել, հաշվի չեն առնվել և միանգամից որոշվել է, որ պետք է գովազդի իրավունք տալ և բացի սրանից՝ այդ նախագծում մենք նաև չենք տեսնում պարզաբանում, թե օրինակ ինչպես է վերահսկվելու, որ այդ եկամուտները նպատակային ծախսվեն։ Ընդհանրապես միջազգային փորձը ցույց է տալիս, որ Հանրային հեռարձակողին այդ կարգի առանձնահատուկ աջակցություն ցույց տալու համար ստեղծվում է առանձին մարմին, որը վերահսկում է հենց այդ լրացուցիչ գումարների օգտագործման հոսքերը, մինչդեռ այս ամբողջը բացակայում է ներկայացված այս օրինագծում, ինչը խոսում է նրա մասին, որ հերթական անգամ այս կամ այն խնդրին Արդարադատության նախարարության կողմից իրավիճակային լուծում է տրվում, իսկ իրավիճակային լուծումներն երբեք որևէ դաշտի զարգացման համար չեն ստեղծում անհրաժեշտ պայմաններ»,- ընդգծեց նա։
Մանրամասները՝ տեսանյութում։