Օրերս ԱԺ Մարդու իրավունքների պաշտպանության և հանրային հարցերի մշտական հանձնաժողովում քննարկվում էր ատելության խոսքը քրեականացնելու մասին նախագիծը։ Հանձնաժողովը միաձայն ընդունեց ատելության խոսքի դեմ աշխատանքային խումբ ստեղծելու առաջարկը: Թեմայի շուրջ «Առաջին լրատվական»-ը զրուցել է ԱԺ «Իմ քայլը» խմբակցության պատգամավոր Մարիա Կարապետյանի և տեղեկատվական անվտանգության փորձագետ Սամվել Մարտիրոսյանի հետ:
«ՀՀ Քրեական օրենսգրքով ռասսայական, կրոնական և ազգային հիմքով թշնամանք հրահրելու համար նախատեսվում է քրեական պատիժ: Հիմա մեր խնդիրն է, որ, բացի այդ երեքից, նաև Սահմանադրության հակախտրականության հոդվածի մյուս հիմքերը նույնպես ներառվեն: Խնդիր ունենք նաև գործող Քրեական օրենսգիրքը համահունչ դարձնել Սահմանադրությանը,- նշեց Մարիա Կարապետյանը: Նա նաև հավելեց, որ ատելության խոսքը վիարվորանքը և զրպարտանքը չէ. «Ատելության խոսքի համար պատժի ենթարկելու իմաստն այն է, որ կանխվի ատելության հիմքով իրական հանցագործության կատարումը: Ատելության խոսքն ինքնին չավարտված հանցագործություն է… Ատելության խոսքի և թշնամության հրահրման հետևանքով հնարավոր է հանցագործություն տեղի ունենա»:
Սամվել Մարտիրոսյանի դիտարկմամբ՝ համացանցում ատելության խոսք միշտ է եղել, բայց հիմա քանակն ու որակը անցել են սահմանները և արդեն վտանգավոր է, որովհետև ակնհայտ է, որ բռնության դրդող ռեալ ռիսկեր կան: «Առանց զսպող մեխանիզմների դժվար թե իրավիճակը դեպի լավը փոխվի: Միտում կա իրավիճակի դեպի ավելի վատթարացում գնալու»,- նկատեց տեղեկատվական անվտանգության փորձագետը:
«Ատելության խոսքը բռնության ծայրահեղ դրսևորում է, երբ կոչ է արվում բռնություն կատարել որևէ անձի կամ խմբի նկատմամբ: Ատելության խոսքը կարող է կապված լինել քաղաքական գործընթացների հետ է,- նշեց Մ. Կարապետյանը: Պատգամավորը նաև հավելեց, որ եվրոպական մի քանի երկրներ ունեն ատելության խոսքի դեմ օրենսդրական կարգավորումներ:
Սամվել Մարտիրոսյանը նկատեց, որ համացանցի օգտագործման մշակույթը մեզ մոտ փաստացի նոր է ձևավորվում. «Մեր հասարակությունը համացանց է մտել մոտ տասը տարի ուշացումով, քան մյուս զարգացած, զարգացող երկրները: Վերջին երեք- չորս տարիներին է հիմնականում մեր բնակչությունը մտել համացանց, և շատերը կարծես թե կորցրել են իրենց, դժվար է դիմակայել վիրտուալ աշխարհի գայթակղությանը, որ ինչ ուզես կարող ես ասել»: Նա նաև հավելեց, որ օրենսդրական կարգավորումների դեպքում սահմանները պետք է հստակ լինեն:
«Ատելության խոսքի տարածումն օգտագործվում է որպես զենք տեղեկատվական հակամարտության մեջ»,- ընդգծեց Ս. Մարտիրոսյանը:
Մանրամասն՝ տեսանյութում:
