Երևանի ավագանու «Լույս» խմբակցությունը շեղվում է «Լուսավոր Հայաստան» կուսակցության գծից. այս մասին հայտարարել են կուսակցության նախագահ Էդմոն Մարուքյանը և կուսակցության անդամ Մանե Թանդիլյանը: Թեմային անդրադառնալու համար «Առաջին լրատվական»-ը հյուրընկալել է քաղտեխնոլոգ Վիգեն Հակոբյանին և քաղաքագետ Ռոբերտ Ղևոնդյանին:
Վիգեն Հակոբյանը չի կարևորում, թե «Լուսավոր Հայաստան» կուսակցության նախագահ Էդմոն Մարուքյանը Երևանի ավագանու «Լույս» խմբակցության անդամ Դավիթ Խաժակյանին ինչ պատճառաբանությամբ է հետ կանչում. «Կարևոր է, թե ինչպես է դա ընկալվում: Իսկ ես կարծում եմ, որ ընկալումը հակառակն է. կա ձևավորված կարծիք, որ խմբակցության տված դոզան գուցե ավելի է եղել այն պայմանավորվածությունից, որ ստրատեգիական առումով գոյություն ունի որոշ քաղաքական ուժերի միջև, և հիմա խնդիր կա վերադառնալու պայմանավորվածություններին: Այս ընկալումը արդեն երկրորդ օրն է՝ «Լուսավոր Հայաստան»-ը չի կարողանում կոտրել»:
Վիգեն Հակոբյանի կարծիքով՝ ավագանու այդ խմբակցությունը սովորական ընդդիմադիր կեցվածք ունի. «Հիմա տոնայնությունը մի քիչ այսպես է, այնպես է… Այնպես չէ, որ մյուս պառլամենտներում զուտ դիվանագիտական լեզվով են միմյանց հետ խոսում. կան պառլամենտներ, որ նույնիսկ անցնում են ձեռնամարտի, և դրանից ոչ ոք ողբերգություն չի սարքում»:
Ուստի քաղտեխնոլոգը կարծում է, որ որոշումն ավելի շուտ քաղաքական է, քան էթիկական՝ ինչպես ներկայացվում է:
Քաղաքագետ Ռոբերտ Ղևոնդյանը, սակայն, այս ամենում տեսնում է քաղաքական ներքին պայքարի տրամաբանություն. «Հաշվի առնենք, որ թե՛ «Լուսավոր Հայաստանը», թե՛ «Հանրապետությունը» «Ելքի» մաս են կազմել, և նրանց որոշակիորեն ձայներ ստանալը «Ելք» դաշինքի մնացորդային էֆեկտն է եղել: Եվ ես այսօր այդ երկու ուժերի միջև դիրքավորման խնդիր եմ տեսնում. «Լուսավոր Հայաստանը» փորձում է ավելի շատ դիրքավորվել որոշակի լեգիտիմության դաշտում, որը նոր Հայաստանի որոշակի հատվածն է, իսկ «Հանրապետություն» կուսակցությունը փորձում է գրավել առավել ընդդիմադիր դիրքեր: Պայմանականորեն ասած՝ «Լուսավոր Հայաստանը» փորձում է լինել առավել կառուցողական ընդդիմություն, «Հանրապետությունը»՝ հին տեսակի ընդդիմադիր: Արդյունքում այս երկու ուժերի միջև կա որոշակի անհամաձայնություն, ինչն անդրադառնում է ավագանիում իրենց աշխատանքի վրա»:
Քաղաքագետի խոսքով՝ այսպիսով Մարուքյանը փորձում է սահմանազատվել այն հատվածից, որը հետագայում հնարավոր է հասարակության մեջ ընդունվի որպես «սևերի» որոշակի մաս. «Դրա համար «Լուսավոր Հայաստանն» ուզում է այսօրվանից իրեն ապահովագրել հետագայում այդ հատվածի հետ առնչվելուց»:
Հարցազրույցն ամբողջությամբ՝ տեսանյութում:
