Դեկտեմբերի 17-ի գիշերը Ադրբեջանական Զինված ուժերը կրակ են բացել Իջևան-Նոյեմբերյան մայրուղու և Կոթի գյուղի ուղղությամբ: Հայաստանի Զինված ուժերի պատասխան կրակից հետո հակառակորդը դադարեցրել է կրակը: Թեմայի շուրջ «Առաջին լրատվական»-ի հետ զրույցում ՀՀ Պաշտպանության փոխնախարար Գաբրիել Բալայանը վստահեցրեց, որ հակառակորդի կրակային կետերը լռեցվել են. «Կրակոցները սկսվել են ադրբեջանական կողմից, հայկական կողմը համարժեք պատասխանել է, փոխհրաձգությունը տևել է մոտ երկու ժամ, պատասխան կրակոցներով հակառակորդը լռեցվել է, օգտագործվել են տարբեր տրամաչափի հրաձգային զինատեսակներ, այդ թվում նաև մեծ տրամաչափի»:
Փոխնախարարը նաև տեղեկացրեց, որ այս տարվա ձմեռային զորակոչին արձանագրվել է դրական դինամիկա: Գ. Բալայանի խոսքով՝ մասնավոր ներդրումների հաշվին բոլոր զորամասերն անցնելու են նոր համազգեստի և կոշիկների:
Խոսելով պաշտպանության նախարարության բյուջետային ծախսերից, որոնք ավելացվել են 2020թ., Գաբրիել Բալայանը նշեց. «Մենք սպառազինության մրցավազքի խնդիր չունենք, մեր կարիքները հստակ գիտենք, և ունենք դրանց համապատասխան սպառազինության պլանավորում: Մենք կարողանալու ենք Ադրբեջանի ձեռքբերածի էֆեկտիվությունը չեզոքացնել»:
Փոխնախարարը նաև հավելեց, որ ՊՆ-ն 2020թ. կհամագործակցի երկու գերատեսչությունների՝ ԿԳՄՍ-ի և Բարձր տեխնոլոգիական արդունաբերության նախարարության հետ, աննախադեպ ծրագիր կիրականացվի: «Հայրենական արտադրության սպառազինություն կունենանք, որոշ նմուշներ մարտ ամսին կցուցադրվեն միջազգային սպառազինության ցուցահանդեսում»,- հավելեց մեր զրուցակիցը:
Մանրամասն՝ տեսանյութում:
