Հայաստանի Հանրապետության Ազգային ժողովում այսօր Ռուսաստանի Դաշնության Դաշնային խորհրդի Միջազգային հարցերով հանձնաժողովի նախագահ Կոնստանտին Կոսաչովն ափոսոսանք է հայտնել, որ ադրբեջանական կողմն անպատասխան է թողել Հայաստանի վարչապետի հայտարարությունը: Վարչապետ Ն. Փաշինյանն ասել էր, որ Արցախի խնդրի կարգավորումը պետք է հաշվի առնի Հայաստանի, Արցախի և Ադրբեջանի շահերը:
Թեմայի շուրջ «Առաջին լրատվական»-ի հետ քննարկմանը մասնակցեցին Երևանի մամուլի ակումբի նախագահ Բորիս Նավասարդյանը, վերլուծաբաններ Հայկ Խալաթյանը և Հակոբ Բադալյանը:
Բորիս Նավասարդյանի դիտարկմամբ՝ անսովոր է, որ ռուս բարձրաստիճան փորձառու պաշտոնյան ինչ-որ առավելություն է տալիս կողմերից մեկին, տվյալ դեպքում՝ Հայաստանին: «Արցախյան խնդրի շուրջ բանակցային գործընթացը մտել է դիրքային պայքարի փուլ, որը ենթադրում է, որ պրակտիկ առաջընթացի համար ակնկալիքներ չկան, սակայն երկու կողմից էլ ակնկալվում է կառուցողական մոտեցում, գործընթացի դինամիկա»:
Հայկ Խալաթյանի կարծիքով՝ Նիկոլ Փաշինյանի հայտարարությունը, որ Արցախյան խնդրի լուծումը պետք է ընդունելի լինի երեք կողմերի համար, քարոզչական հնարք է, որն առաջին հերթին ուղղված էր միջազգային հանրությանը և համանախագահներին: «Մինչ այժմ մենք չգիտենք, թե Նիկոլ Փաշինյանն ինչպես է պատկերացնում այդ խնդրի լուծումը»,- նշեց վերլուծաբանը՝ հավելելով, որ Ադրբեջանը առայժմ լուծման միայն մեկ ձև է ընդունում, դա իր տարածքային ամբողջականության պահպանումն է:
Հակոբ Բադալյանի գնահատմամբ՝ Կոսաչովի ձևակերպումն արտահայտում է ավելի լայն իմաստով տեղի ունեցող քաղաքական միտումները, որոնք մի քանի շերտի կարող են բաժանվել: «Երբ Ռուսաստանում տեսնում են, թե ինչպես է զարգանում հայկական հարցը ամերիկյան քաղաքականության մեջ, կարծում եմ, դա նրանց խորհելու տեղիք է տալիս, թե ինչպիսի վերաբերմունք պետք է ունենալ Հայաստանի նկատմամբ… Մինչ 2016թ. ապրիլյան պատերազմը Մոսկվան ընկած էր ադրբեջանաթուրքական քաղաքական հուն և փաստացի սպասարկում էր այդ քաղաքականությունը՝ իհարկե ակնկալելով նաև իր համար արդյունքներ: Հայկական բանակի ինքնիշխան դիմադրությունը և Ռուսաստանին օգնության չդիմելը Մոսկվային ստիպեց առերեսվել այդ քաղաքականության վտանգների հետ: Այդ ժամանակվանից սկսած՝ նկատելի է որոշակի տրանսֆորմացիայի փորձ ՌԴ քաղաքականության մեջ: Հիմա Հայաստանում լեգիտիմ իշխանության ձևավորումը և դրան զուգընթաց Ռուսաստանի առաջ պատասխանատվության նշաձողեր սահմանելու քաղաքականությունն, իհարկե, պետք է ստիպի Մոսկվային վերանայել իր մոտեցումներն ու քաղաքականությունը»:
Մանրամասն՝ տեսանյութում: