Դեկտեմբերի 20-ին Նիկոլ Փաշինյանը մեկնում է Սանկտ Պետերբուրգ, որտեղ նա մասնակցելու է ԱՊՀ երկրների ու ԵՏՄ անդամ երկրների ղեկավարների ոչ պաշտոնական տարեվերջյան հավաքին, որ ավանդաբար տեղի է ունենում Ռուսաստանում: Այդ հավաքին, որպես ԱՊՀ անդամ երկրի ղեկավար, մասնակցելու է նաև Ադրբեջանի նախագահ Իլհամ Ալիևը:
Փաշինյան-Ալիև պաշտոնական հանդիպման հնարավորության մասին որևէ բան ազդարարված չէ, սակայն, ինչպես արդեն հայտնի է, կա նաև նրանց, այսպես ասած, ոչ պաշտոնական շփումների պրակտիկա: Օրինակ՝ Փաշինյանն ու Ալիևը տևական զրույց էին ունեցել Բիշքեկում՝ ԱՊՀ վեհաժողովին, պաշտոնական ընթրիքի սեղանի շուրջը: Կլինի՞ զրույց Սանկտ Պետերբուրգում՝ հատկապես նկատի ունենալով այն, որ դրանից մի քանի օր առաջ ադրբեջանցիները կրակ էին բացել Տավուշի ուղղությամբ: Կրակոցներն իհարկե անցել էին առանց որևէ հետևանքի, սակայն պետք է հասկանալ՝ դրանք ունեցե՞լ են քաղաքական շարժառիթ, թե՞ եղել են պարզապես ինչ-որ խրամատային իրողությունների հետևանք:
Սանկտ Պետերբուրգում երկու ղեկավարների միաժամանակ գտնվելու հանգամանքը հատկապես հետաքրքիր է Ադրբեջանում տեղի ունեցող ներքաղաքական զարգացումների ֆոնին, որոնք ստացել են բավականին դինամիկ և անսպասելի ընթացք: Այնտեղ տեղի է ունենալու խորհրդարանի արտահերթ ընտրություն, ինչը գնահատվում է իշխանության խորքային սերնդափոխության համատեքստում՝ ներառելով մինչև անգամ Իլհամ Ալիևի դիրքը, որը, ըստ տարածված գնահատականի, պատրաստվում է իշխանությունը փոխանցել տիկնոջը: Եվ այստեղ հատկապես նշանակալի է փաստը, որ այդ գործընթացները արագացել են այն բանից հետո, երբ Մեհրիբան Ալիևան նոյեմբերին առաջին անգամ պաշտոնական այց կատարեց Ռուսաստան՝ այնտեղ հանդիպելով նաև ՌԴ նախագահ Պուտինի հետ: Դա Մեհրիբան Ալիևայի «քննությունն» էր Ադրբեջանում իշխանությունը ստանձնելու հեռանկարի առնչությամբ, և այն, որ նրա վերադարձից բառացիորեն օրեր անց հայտարարվեց խորհրդարանի լուծարման մասին, հուշում է, որ նա անցել է մոսկովյան «քննությունը»: Մեհրիբանի հետ հանդիպմանը Պուտինը հայտարարել էր, թե սպասում է Իլհամ Ալիևին դեկտեմբերին Սանկտ Պետերբուրգում:
Արդյոք սանկտպետերբուրգյան հանդիպմանը կարո՞ղ է ավարտվել Ադրբեջանի իշխանության, այսպես ասած, ընդունման-հանձնման գործընթացը ամբողջությամբ: Մեհրիբան Ալիևայի՝ Ռուսաստանից վերադարձից հետո հայտարարվեց խորհրդարանը լուծարելու և արտահերթ ընտրություն նշանակելու մասին: Ի՞նչ կլինի Ադրբեջանում Իլհամ Ալիևի՝ Սանկտ Պետերբուրգից վերադարձից հետո, և արդյոք Սանկտ Պետերբուրգը կարո՞ղ է լինել վերջին մայրաքաղաքը, որտեղ Իլհամ Ալիևը նախագահի կարգավիճակում կարող է գտնվել Նիկոլ Փաշինյանի հետ համաժամանակ: Համենայնդեպս, այն դինամիկան, որ Մեհրիբան Ալիևայի այցից հետո ստացել է Ադրբեջանի ներիշխանական զարգացումը, առնվազն տալիս է այդպիսի հարցի գոյության հիմք:
