Օրենքով գող Շաքրո Մոլոդոյը (Զախարի Քալաշով) նախատեսել էր Մոսկվայի Ռոչդելսկայա փողոցում գտնվող Elements ռեստորանի բռնագրավում: Այս մասին դատախազը հայտարարել է Մոսկվայի քաղաքային դատարանում ՌԴ ՔԿ-ի բարձրաստիճան պաշտոնյաների կողմից կաշառք ստանալու մասին գործով դատական նիստի ժամանակ, գրում է «Մոսկովսկի կոմսոմոլեց» թերթը:
Ինչպես երևում է Դատախազի հնչեցրած գործի նյութերից, քրեական հեղինակությունը պատրաստվում էր Ժաննա Քիմի հեղինակային խոհանոցի փոխարեն խինկալիանոց բացել։ Միևնույն ժամանակ, հաստատությունը գրավելու մասին որոշումը Շաքրոն միայնակ չի կայացրել, այլ ուրիշ օրենքով գողերի հետ համատեղ՝ Elements-ում փոխհրաձգությունից երկու ամիս առաջ տեղի ունեցած հանդիպման ժամանակ:
Դիզայներ Ֆաթիմա Միսիկովան հեղինակությունների սուրհանդակն է եղել. նա պետք է հավաքեր և լիարժեք տեղեկատվություն տրամադրեր ռեստորանի անվտանգության և «տանիքի» մասին:
«Ծրագրի կատարումը վստահվել է Սոլնցևսկայայի կազմակերպված հանցավոր խմբի ղեկավարին՝ Իտալացի մականունով քրեական հեղինակությանը (Անդրեյ Կոչույկով), որը ուղղակիորեն կախված է օրենքով գող Շաքրո Մոլոդոյից», – ասել է դատախազը:
Նախկինում հաղորդվել էր, որ Միսիկովայի և հաստատության տիրուհի Ժաննա Քիմի միջև կոնֆլիկտ է առաջացել այն բանից հետո, երբ դիզայները ռեստորատորին մեղադրել է իր ծառայությունների դիմաց ամբողջովին չվճարելու մեջ:
Կոչույկովը հայտարարել է, որ իր ընկերուհին՝ Միսիկովան, բողոքել է Քիմից, և ինքը գնացել է ռեստորան՝ կանանց միջև կոնֆլիկտը լուծելու համար, սակայն դատախազն ասել է, որ Իտալացին ռեստորանի գրավման համար օգտվել է «Զասլոն» մասնավոր անվտանգության ընկերությունից, որտեղ աշխատում էին նախկին իրավապահներ:
Կոչյուկովի և Շաքրոյի գործընկերներից մեկը, ըստ դատախազի, ոստիկանության պաշտոնաթող գնդապետ Եվգենի Սուրժիկովն էր, որը նախկինում աշխատել է ՆԳՆ անվտանգության բաժնում: Սուրժիկովը Շաքրոյի մոտ պատասխանատու էր մարդկանց առևանգման համար և պահպանում էր կապը հանցագործների և իրավապահ մարմինների միջև:
