Ըստ հայտարարության՝ Հայաստանի և Ռուսաստանի արվեստի և մշակույթի 60 հայազգի գործիչ նույնաբովանդակ հայտարարություն են տարածել, որով կոչ են արել ազատել կալանքից Ռոբերտ Քոչարյանին՝ փոխել նրա խափանման միջոցը։
Ըստ ձեզ՝ սա՞ է մեր մշակույթի դեմքը․ «Առաջին լրատվական»-ի հարցին գեղանկարիչ, լուսանկարիչ, բանաստեղծ, ՀՀ արվեստի վաստակավոր գործիչ Սամվել Սևադան պատասխանեց․ «Այստեղ խնդիրն այն է, որ նրանք էլ շատ լավ գիտեն, թե Մարտի 1-ին ինչ է կատարվել։ Հարսանիքի ժամանակ ով լավ պատվեր՝ շաբաշ է տալիս, նա էլ պարացնում է բոլորին։ Հիմա կարող ենք ասել, որ այստեղ պարողների անսամբլ է հավաքված, որոնք այդ շաբաշի տակ պարում են։ Ես չեմ կարող ասել, որ նրանք դրա համար վճարվում են, ուղղակի նրանց սիմպատիան, համակրանքն այդ մարդու կողմն է։ Դա նրանց իրավունքն է»։
Իսկ քանդակագործ Վիգեն Ավետիսն էլ ասաց․ «Նախ, ինչքան գիտեմ, արդեն հինգ հոգի հրաժարվել է, և եթե իրոք հրաժարվել են, ուրեմն նրանք պետք է դատի տա։ Այսինքն՝ նրա անունն արդեն օգտագործվել է, և մարդկանց ուղեղում արդեն տպվել է, որ եթե նրանք դատի չտան, ուրեմն մասնակից են այդ ցուցակին։ Ինչպես ես տեսա՝ այն շատ գրագետ կազմված հայտարարություն էր, և շատ լավ հոգեբաններ ու իրավաբաններ էին աշխատել այդ տեքստի վրա, որովհետև այդ խմբի 90 տոկոսն այդքան չէր կարող գրել՝ նրանք չեն կարող այդպես արտահայտվել»։
Մանրամասները՝ տեսանյութում։
