Այսօր Բարձրագույն դատական խորհուրդը մասնակի բավարարեց փաստաբան, Սահմանադրական դատարանի դատավորի թեկնածու Կարապետ Բադալյանի միջնորդությունը Կարգապահական հարցերի հանձնաժողովի նախագահ Մխիթար Պապոյանին ինքնաբացարկ հայտնելու և իր նկատմամբ հարուցված կարգապահական պատասխանատվության ենթարկելու վարույթը կարճելու մասին։
Դատավոր Մխիթար Պապոյանին ինքնաբացարկ հայտնելու մասով ԲԴԽ-ն մերժեց Բադալյանի միջնորդությունը, սակայն կարգապահական վարույթը կարճելու մասով՝ բավարարեց այն։
Հիշեցնենք, որ Բադալյանը Մխիթար Պապոյանին ինքնաբացարկի միջնորդություն էր ներկայացրել այն հիմքով, որ Պապոյանը իր բազմաթիվ հարցազրույցներում նշել էր, որ դատավոր Ալեքսանդր Ազարյանն իր ընկերն է։
Այսպիսով, դատավորի թեկնածու Կարապետ Բադալյանի նկատմամբ կարգապահական վարույթ հարուցելու մասին դատավորների Կարգապահական հարցերի հանձնաժողովի կողմից ԲԴԽ ներկայացված միջնորդության քննությունը կարճվեց։ Բադալյանն այսպիսով չենթարկվեց կարգապահական պատասխանատվության
ԲԴԽ-ն հրապարակեց իր որոշման միայն եզրափակիչ մասը։ Որոշման ամբողջական տեքստը, Դատական օրենսգրքի համաձայն, կուղարկվի կողմերին և կտեղադրվի Դատական իշխանության պաշտոնական կայքում։
Նկատենք, որ սա աննախադեպ որոշում է, և հետաքրքիր կլինի ծանոթանալ դրա պատճառաբանական մասին։
Կարապետ Բադալյանն «Առաջին լրատվական»-ի հետ զրույցում ասաց, որ դեռ չի ծանոթացել որոշմանը, կծանոթանա հիմքերին, նոր կարծիք կհայտնի։
Հիշեցնենք, որ Կարապետ Բադալյանի նկատմամբ կարգապահական վարույթ հարուցելու միջնորդությունը ներկայացրել էր Ռոբերտ Քոչարյանի և «5-րդ ալիք» հեռուստաընկերության սեփականատեր Արմեն Թավադյանի պաշտպան Հովհաննես Խուդոյանը 1in.am-ին տված՝ Կարապետ Բադալյանի հարցազրույցում հնչեցվածի հիման վրա։ Կարապետ Բադալյանը մեր տաղավարում հարցազրույցներից մեկի ժամանակ կարծիք էր արտահայտել նաև Վերաքննիչ քրեական դատարանի դատավոր Ալեքսանդր Ազարյանի նկատմամբ։ Հնչեցված որակումները, որը, ըստ Խուդոյանի, Կարապետ Բադալյանի կողմից քաղաքական զսպվածության և չեզոքության նորմերի խախտում է։
ԲԴԽ-ն փաստացի կարգապահականի հիմքեր չտեսավ։
