Հանրային և մասնագիական քննարկումների շրջանակ են վերադառնում խնդիրներ, որոնք ժամանակին եղել են հանրային ուշադրության կենտրոնում, բայց որոշ ժամանակ սառեցվել էին: Օրինակ՝ կրկին անհանգիստ է Ամուլսարում. այսօր «Լիդիան Արմենիա» ընկերությունը նախաձեռնել է իր տարածքում գտնվող տնակների հեռացումը: Այսօր թեժ է ընթացել նաև Երևանի ավագանու նիստը Մաշտոցի պուրակի խնդրով: Այս թեմաների շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, վերլուծաբան Հակոբ Բադալյանը և «Քաղաքացու որոշում» կուսակցության գործադիր մարմնի անդամ Հայկ Սահակյանը:
«Եթե Ամուլսարի հարցը առաջացել է և արդեն երկու տարի է լուծում չի ստացել, պարզ է, որ այդ հարցն իրեն զգացնել է տալու: Ամուլսարի հարցը քաղաքական որոշ շրջանակների համար դարձել է քաղաքական մակաբուծությունների հարմար տեղ»,- նշեց Հակոբ Բադալյանը՝ հավելելով, որ գնալով խնդրի լուծումն էլ ավելի է բարդանում, պետությունը պետք է պատասխանատվություն ստանձնի որևէ լուծում գտնելու հարցում:
Ազատ Արշակյանի դիտարկմամբ՝ Ամուլսարի խնդիրը հեղափոխության օրակարգից շեղող հարց է. «Շատ լուրջ խնդիրներ ունենք, մենք պետություն ենք կառուցում ու պետականաշինության այս փուլում շատ հարցեր կան՝ սկսած Սահմանադրության հարցից մինչև պետության հայեցակարգի հարցը: Ամուլսարի հարցը մասնագիտական լուծում է պահանջում. իշխանությունը պետք է գտնի վստահելի, միջազգային հեղինակություն ունեցող փորձագիտական կազմակերպություն, որը կարծիք կհայտնի բնության պահպանության տեսանկյունից հանքի շահագործումը կործանարար է, թե ոչ, և արդյոք թույլատրելի վնասի շրջանակներում է… Իշխանությունը պետք է վճռականություն ցուցաբերի և խնդրի լուծման որոշում կայացնի՝ այո կամ ոչ, այլևս չի կարելի ձգձգել: Այս հարցի շուրջ քաղաքական շահարկումներ կան»:
«Փաստարկների ժամանակն անցել է: Վարչապետը խոստումներ է տվել, որոնք չեն իրականացվել,Կառավարությունը կոնֆլիկտը կառավարել չկարողանալու կամ կառավարել չցանկանալու դիրքորոշում ունի, ստեղծվել է մի իրավիճակ, որ Ամուլսարի հարցում Կառավարությունը հանրությանը դրդում է բախման «Լիդիանի» հետ, խնդիրը գնում է ուժային լուծման»,- նշեց Հայկ Սահակյանը:
Մանրամասն տեսանյութում:
