Rhosus նավը, որը Բեյրութ էր հասցրել ամոնիումի նիտրատի բեռ, որը, ենթադրվում է, օգոստոսի 4-ին հրեշավոր պայթյունի պատճառ է դարձլ, խորտակվել է Բեյրութի նավահանգստի հյուսիսային մասում 2018 թվականի փետրվարին: Այս մասին հայտնում է ամերիկյան New York Times թերթը՝ հղում անելով նավերի տեղաշարժին և արբանյակներից ստացված պատկերների վերլուծությանը:
Նշվում է, որ 2013 թվականի սեպտեմբերին նշված նավը դուրս է եկել վրացական Բաթումիից և ուղևորվել Մոզամբիկ: Սակայն հարկադրաբար կանգ է առել Լիբանանի մայրաքաղաքում՝ լրացուցիչ բեռներ վերցնելու համար:
Ըստ Rhosus-ի նախկին կապիտան Բորիս Պրոկոշևի՝ անձնակազմին հարկավոր էր լրացուցիչ գումար վաստակել Սուեզի ջրանցքով անցումը վճարելու համար: Ըստ նավի պարտատերերին ներկայացնող փաստաբանների՝ լրացուցիչ բեռը պետք է հասցվեր Հորդանան:
Բայց Բեյրութում նավահանգստի վարչակազմը գտել է բազմաթիվ թերություններ և առգրավել է նավը, անձնակազմի անդամներին պարտավորեցրել են մնալ նավի վրա: 2014-ի օգոստոսին անձնակազմն արձակվել է, և նավը մնացել է լքված:
Բացի այդ, Լիբանանի իշխանությունները մոտ 2,750 տոննա ամոնիումի նիտրատ են տեղափոխել նավահանգստի պահեստ:
Ըստ NYT-ի՝ 2015-ին նավը հեռացվել է մոտ 300 մետր գտնվելու վայրից, որպեսզի չխանգարի նավերի տեղաշարժին: Արբանյակային պատկերների համաձայն՝ 2018-ի փետրվարին «Ռոսուս» -ը մի քանի օրվա ընթացքում ջրասույզ է եղել: