Միացյալ Նահանգների ներկայիս նախագահ Դոնալդ Թրամփը ցանկություն է հայտնել, որ իր պատկերը նույնպես փորագրված լինի Ռաշմոր լեռան վրա գտնվող ամերիկյան չորս նախագահների հարթաքանդակների կողքին: Այս մասին հայտնում է The New York Times-ը՝ վկայակոչելով Հանրապետական կուսակցության աղբյուրներին:
Ըստ նրանց՝ Թրամփը Սպիտակ տանը կայացած առանձնազրույցի ընթացքում Հարավային Դակոտայի նահանգապետ Քրիստի Նոեմի հետ կիսել է Ռաշմոր լեռան լանջին սեփական հարթաքանդակը ավելացնելու գաղափարը:
Նշվում է, որ ոչ միայն Թրամփն է բարձրաձայն արտահայտել այդ գաղափարը, այլև 2019-ին Սպիտակ տան օգնականներից մեկը հետաքրքրվել է Հարավային Դակոտայի նահանգապետի վարչակազմից, թե ինչ գործառույթներ պետք է իրականացվեն, որպեսզի հարթաքանդակը ավելացվի:
Բացի այդ, ըստ աղբյուրների, Նոեմը հուլիսին Թրամփին է նվիրել Ռաշմոր լեռան 1,2 մետր բարձրությամբ կրկնօրինակը՝ հինգ նախագահների, այդ թվում՝ Թրամփի հարթաքանդակով: