Այդ մասին կխոսենք Խաղաղության պայմանագիր կնքելուց հետո, հայտարարել է Հայաստանի ԱԺ նախագահը ԵԱՀԿ Մինսկի խումբը լուծարելու հարցով ԵԱՀԿ-ին դիմելու մասին Իլհամ Ալլիեւի հայտարարության առնչությամբ:
«Երբ որ խաղաղության պայմանագիր են կնքում, դրա իմաստն ուղղակի կորում է։ Չէ որ նույն Ադրբեջանն ասում է, թե Հայաստանն ինչ-որ նկրտումներ ունի, ինչ-որ պահանջներ ունի, ասում եմ՝ խաղաղության պայմանագիրը կկնքենք և հարցը դուրս կգա», հայտարարել է Հայաստանի խորհրդարանի խոսնակը: Փաստացի, Երեւանը մերժում է Բաքվի առաջարկը, կապելով այն Խաղաղության պայմանագրի հետ:
Եթե իհարկե ԱԺ նախագահի հայտարարությունը հնարավոր է գնահատել Երեւանի պատասխան: Այստեղ սակայն կա որոշակի դիտարկման կարիք՝ Երեւանը մերժու՞մ է, թե՞ պարզապես իր հերթին առաջարկում Մինսկի խմբի եւ համանախագահության հարցը հանելու, այն լուծարելու «այլընտրանքային» տարբերակ՝ Խաղաղության պայմանագիր: Հայաստանի խորհրդարանի նախագահն ասում է, որ պայմանագիրը կկնքվի եւ հարցը դուրս կգա ինքնաբերաբար: Միջազգային բացառիկ ձեւաչափ-մանդատի առնչվող հարցերը դուրս չեն գալիս «ինքնաբերաբար», մեխանիկորեն, ինքստինքյան, եւ այլն:
Մինսկի խումբն ու համանախագահությունը ԵԱՀԿ որոշումով ստեղծվել են շատ կոնկրետ նպատակի, կոնկրետ խնդիրներ լուծելու համար, հետեւաբար այդ մանդատը, այդ ձեւաչափը կարող է լուծարվել միայն այն բանից հետո, երբ որոշում կայացնող մարմնի մակարդակով կքննարկվի դրա գործունեության արդյունքը, կլինի գնահատական, ըստ այդմ՝ եզրակացություն:
Ադրբեջանը սրանից է, որ փորձում է խուսափել, այս գործընթացն է, որ փորձում է արգելափակել: Խաղաղության պայմանագրից առաջ, թե հետո, միեւնույն է, չի կարող դրվել Մինսկի խմբի լուծարման հարց, եթե չի քննարկվել խմբի գործունեությունը, չի եղել հաշվետվություն դրա վերաբերյալ: Դա կարեւոր է նաեւ Հայաստանի անվտանգության համար:
