Վենեսուելան վերսկսում է ԱՄՆ-ի հետ ուղիղ բանակցությունները երկու երկրների հարաբերությունների վերականգնման շուրջ։
«Ես ընդունել եմ ԱՄՆ կառավարության առաջարկը՝ վերսկսել ուղղակի երկխոսությունը», – ասել է Վենեսուելայի նախագահը։
Նախագահը նշել է, որ բանակցություններին, որոնք կմեկնարկեն հուլիսի 3-ին, կմասնակցեն Ազգային ժողովի նախագահ Խորխե Ռոդրիգես Գոմեսը և Էկտոր Ռոդրիգես Կաստրոն:
«Մենք կվարենք բանակցություններ, որպեսզի կնքենք նոր համաձայնագրեր և հասնենք արդեն նախկինում կնքված պայմանագրերի կատարմանը»,- նշել է նախագահը։
Վենեսուելայի կառավարությունն ԱՄՆ-ի հետ դիվանագիտական հարաբերությունները խզել է 2019 թվականի հունվարի 23-ին այն բանից հետո, երբ ամերիկյան վարչակազմը Խուան Գուայդոյին ճանաչեց որպես հանրապետության ժամանակավոր նախագահ։
Միացյալ Նահանգները և նրա դաշնակիցները միակողմանի կարգով ավելի քան 930 սահմանափակող միջոցներ են սահմանել Վենեսուելայի նկատմամբ։ Հանրապետության տնտեսությանը ամենամեծ վնասը հասցրել են 2019 թվականի պատժամիջոցները PDVSA նավթ-գազի պետական ընկերության նկատմամբ։
