«Փինք Հայաստանը» Հայաստանում գեյ–շքերթ կազմակերպելու նպատակ չունի: Այսօր «Առաջին լրատվական»-ի հետ զրույցում այս մասին տեղեկացրեց «Փինք Հայաստան» կազմակերպության կոորդինատոր Մամիկոն Հովսեփյանը՝ խոսելով այսօր կազմակերպված Բազմազանության շքերթի մասին:
Ըստ կազմակերպության համակարգողի՝ ընդամեն այսօր մշակութային բազմազնության համաշխարհային օրն է, և իրենց կազմակերպությունը որոշել է պարզապես այդ օրը տոնել, ինչպես այլ կազմակերպություններ այլ տոներ են տոնում: Մամիկոն Հովսեփյանը նշեց, որ նախորդ տարիներին այս տոնը չի նշվել, ինչպես շատ տոներ։ Նա նաև ասաց, որ Երևանի քաղաքապետարանը շքերթի մասին իրազեկված է և որպես ի գիտություն ընդունել է:
«Օրինակ ունենք պաստառ, որի վրա ներկայացված է տարբեր ազգերի տարազներ, հիմնականում՝ Հայաստանում բնակվող ազգային փոքրամասնությունների, ունենք բնապահպանական պաստառներ և այլն: Մենք չենք նախատեսել և հատուկ ստուգիչ մեքենաներ չունենք, որպեսզի նաև մասնակիցների սեռական կողմնորոշումը ստուգենք, մենք չենք նախատեսում, որպեսզի գան հատուկ գեյեր և լեսբուհիներ: Ընդհանրապես սա ոչ մի կապ չունի գեյ–շքերթի հետ: Եթե մենք ցանկանայինք, մենք դա կանվանեինք «գեյ–շքերթ», մենք դա չէինք անվանի այլ անունով»,- նշեց Մամիկոն Հովսեփյանը՝ հավելելով, որ հուրախություն նացիստների, ֆաշիստների՝ նման շքերթ կազմակերպելու մտադրություն «Փինք Հայաստան» կազմակերպությունը չունի: