Հայաստանում Իրանի դեսպան Մեհդի Սոբհանին հայտարարել է, թե իրենց քաղաքականությունը Հայաստանի հանդեպ սկզբունքային է.
«Եւ բոլոր այն կառավարությունները, որ իշխանության են գալիս, այդ քաղաքականության շրջանակներում են գործում»,- ասել է նա։ Դեսպանը կրկնել է Իրանի կողմից բազմիցս հնչեցրած այն դիրքորոշումը, որ հարգում են Հայաստանի ինքնիշխանությունը և դեմ են միջազգայնորեն ընդունված սահմանների և աշխարհքաղաքական որևէ փոփոխության. «Այս դիրքորոշումը երբեք չի փոխվի՝ անկախ նրանից, թե Իրանում կամ Հայաստանում ով կգա իշխանության»,- ասել է նա։
Դեսպանն անդրադարձել է նաև Պաղեստինի պետությունը ճանաչելու՝ ՀՀ որոշմանը, նշելով, թե Հայաստանը ճիշտ քայլ է արել. «ՀՀ–ի կողմից այս քաջ ու դրական քայլը ցույց է տալիս, որ միջազգային հանրությունը իսկապես կարևորում է Պաղեստինի ժողովրդի իրավունքները, ինչպես նաև դեմ է հանդես գալիս այն իրավունքների խախտմանը, որ դրսևորվում է Պաղեստինի կանանց, տղամարդկանց ու երեխաների նկատմամբ` սիոնիստական ռեժիմի կողմից»։
Ադրբեջանի ագրեսիվ հրետորաբանության մասին հարցին դեսպանը պատասխանել է. «Եթե երկրները խաղաղության հայտ են ներկայացնում, չպիտի իրար հետ խոսեն սպառնալիքի լեզվով։ Ինչ վերաբերում է Հայաստանի հետ համագործակցության ձևին, դա կախված է Հայաստանի կառավարությունից։ Մենք մեր պատրաստակամությունը հայտնել ենք՝ փոխադարձ ընկալումների վրա համագործակցել բոլոր ոլորտներում․ դա, սակայն, պիտի լինի փոխադարձ ցանկությամբ»։
Հիշեցնենք, որ այսօր մեկնարկել են Իրանի նախագահի ընտրությունները։ Ընտրատեղամաս է բացվել նաև ՀՀ-ում Իրանի դեսպանատանը։
