Գեղարքունիքի մարզի Սևան համայնքում 2023 թվականի դեկտեմբերից ՄԱԿ-ի զարգացման ծրագրի ֆինանսավորմամբ և Սևանի համայնքապետարանի համաֆինանսավորմամբ Սևանում մեկնարկել է Սևան համայնքի ղեկավարին կից Կանանց և երիտասարդների խորհրդակցական մարմնի «Թող լինի այգի» ծրագիրը:
Ինչպես տեղեկացանք Սևանի համայնքապետարանի աշխատակազմից, ծրագրի շրջանակներում իրականացվել են հանդիպումներ ու քննարկումներ, որոնց առանցքում եղել է ապագա այգու տեսլականը: Այդ հանդիպումների ընթացքում էլ ծնվել է փոքրիկ պուրակ ունենալու գաղափարը, որն այս օրերին կյանքի է կոչվել շինարարական աշխատանքների տեսքով:
Արդեն իրականացվել են հարդարման աշխատանքներ, կառուցվել է ճեմուղի և սալիկապատվել, պուրակի տարածքն ապահովված է հոսանքով, տեղադրվել են տեսախցիկներ, նախատեսվում է տեղադրել նստարաններ, ընթացքի մեջ է տարածքը ջրով ապահովելու հարցը, առանձնացվելու է գոտի երեխաների համար:
Սևանի համայնքապետարանի կողմից իրականացվում է նաև տարածքի հսկում և պահպանություն աշխատակցի միջոցով:
«Առջևում դեռ շատ անելիքներ կան, իսկ ամենակարևորն այն է, որ սրտացավ մարդիկ համախմբվեն երազանքի այգի ունենալու գաղափարի շուրջ, որի արդյունքում Սևանը կունենա ներկայանալի, ժամանակակից չափորոշիչներին համապատասխան հանգստի ու ժամանցի վայր, որը սևանցիների հոգածության ու խնամքի շնորհիվ կծաղկի ու կդառնա երկարակյաց»,-ներկայացրին Սևանի համայնքապետարանի աշխատակազմից:
ՄԱԿ-ի Զարգացման ծրագրի (ՄԱԶԾ) «Կանայք քաղաքականության, հանրային կառավարման և քաղաքացիական հասարակության մեջ» ծրագիրը ՀՀ տարածքային կառավարման և ենթակառուցվածքների նախարարության և ՕքսԵՋեն հիմնադրամի հետ համագործակցությամբ, ինչպես նաև՝ ՄԹ Լավ կառավարման հիմնադրամի ֆինանսավորմամբ, հայտարարել էր դրամաշնորհային ծրագրերի մրցույթ Համայնքի ղեկավարին կից կանանց և երիտասարդների խորհրդակցական մարմինների անդամների համար, որին մասնակցել են նաև Սևան համայնքի ղեկավարին կից` կանանց և երիտասարդների խորհրդակցական մարմնի անդամները, ներկայացրել «Թող լինի այգի» ծրագրային նախագիծը, որն արժանացել է հավանության, հաղթահարել մրցութային փուլը և համաֆինանսավորվում է Սևանի համայնքապետարանի ու ՄԱԶԾ կողմից: