Լոռու մարզպետ Արամ Ղազարյանը այցելել է Քարկոփ բնակավայր։
Այստեղ Լոռու մարզպետ Արամ Ղազարյանը փոխմարզպետ Հովհաննես Ավետիսյանի, Ալավերդի համայնքի ղեկավար Դավիթ Ղումաշյանի ուղեկցությամբ հանդիպել է բնակիչների հետ։ Մարզպետը հանգամանորեն ներկայացրել է աղետի գոտու վերականգնման նպատակով տարվող աշխատանքների արդեն հաջորդ փուլով նախատեսված կամուրջների, ճանապարհների վերականգնման ուղղությամբ նախատեսված ծրագրերը։
Մարզի ղեկավարը նշել է, որ տարբեր գերատեսչությունների հետ ներկայում քննարկվում են վարկային արտոնություններին վերաբերող, ինչպես նաև տրանսպորտային միջոցներին, այգիներին, գյուղատնտեսական նշանակության հողատարածքներին և անասնապահությանը հասցված վնասների հետ կապված հարցերը։ Արդյունքների մասին առաջիկայում կիրազեկվի։
Ինչ վերաբերում է աղետից վնասված շենք-շինություններին, բնակարաններին և գույքին հասցված վնասներին, ապա մարզի ղեկավարն ասել է, որ մոտակա օրերին ՀՀ կառավարության որոշմամբ կսահմանվի փոխհատուցման տրամադրման կարգը։ Մարզպետը պատասխանել է նաև բնակիչների հարցերին։
